Dr. NTR University of Health Sciencesలో పరిశోధనా దినోత్సవ వేడుకలు మరియు డా. యెల్లాప్రగడ సుబ్బారావు విగ్రహ ఆవిష్కరణ
విజయవాడ, జనవరి 12, 2026:
ప్రపంచ వైద్య విజ్ఞానానికి ఎనలేని సేవలందించిన మహా శాస్త్రవేత్త Dr. Yellapragada Subbarow జయంతి సందర్భంగా, డా. ఎన్టీఆర్ యూనివర్శిటీ ఆఫ్ హెల్త్ సైన్సెస్ (డా. ఎన్టీఆర్ యూహెచ్ఎస్), విజయవాడలో సోమవారం ఉదయం 11 గంటలకు పరిశోధనా దినోత్సవ వేడుకలు ఘనంగా నిర్వహించబడ్డాయి .
ఈ సందర్భంగా డా. యెల్లాప్రగడ సుబ్బారావు విగ్రహాన్ని ఆంధ్రప్రదేశ్ రాష్ట్ర ఆరోగ్య, కుటుంబ సంక్షేమ & వైద్య విద్య శాఖ గౌరవ మంత్రి శ్రీ సత్య కుమార్ యాదవ్ గారు అధికారికంగా ఆవిష్కరించారు. ఆధునిక వైద్య శాస్త్రానికి పునాదులు వేసిన ఈ మహానుభావునికి విశ్వవిద్యాలయం ఘన నివాళులు అర్పించింది.
ఈ కార్యక్రమానికి రాష్ట్రవ్యాప్తంగా ఉన్న 36 వైద్య కళాశాలలు మరియు అనుబంధ దంత కళాశాలల ప్రిన్సిపాళ్లు, వైస్-ప్రిన్సిపాళ్లు హాజరై కార్యక్రమాన్ని ఘనతరం చేశారు.
డా. యెల్లాప్రగడ సుబ్బారావు గారు ఆధునిక బయోకెమిస్ట్రీ పితామహుడిగా ప్రపంచవ్యాప్తంగా గుర్తింపు పొందారు. ఆయన పరిశోధనలు కోట్లాది మందికి ప్రాణాలు కాపాడుతున్నాయి.
ATP (అడెనోసిన్ ట్రైఫాస్ఫేట్) కణాలలో శక్తి మూలమని గుర్తించి, జీవ విజ్ఞానంలో విప్లవాత్మక మార్పులకు దారితీశారు
క్యాన్సర్ చికిత్సలో వినియోగించే మెథోట్రెక్సేట్ (Methotrexate) ఔషధ అభివృద్ధికి కీలకంగా సహకరించారు
మొదటి విస్తృత ప్రభావ యాంటీబయోటిక్ ఆవిష్కరణకు ప్రేరణగా నిలిచి, ఆధునిక యాంటీబయోటిక్ చికిత్సకు బాటలు వేశారు
కాలానికి ముందే ఆలోచించిన దూరదృష్టి గల శాస్త్రవేత్తగా, డా. సుబ్బారావు కృషి నేటికీ ప్రపంచవ్యాప్తంగా కోట్లాది ప్రాణాలను రక్షిస్తోంది.
పరిశోధనా దినోత్సవంలో భాగంగా అధ్యాపకులు, పీజీ విద్యార్థులు, ఇంటర్న్లు మరియు ఎంబీబీఎస్ విద్యార్థులు నిర్వహించిన ఉత్తమ పరిశోధనలకు పరిశోధనా అవార్డులు ప్రదానం చేయబడింది. ఇది యువ వైద్యుల్లో పరిశోధనపై ఆసక్తిని, నవోత్తేజాన్ని పెంపొందించడమే లక్ష్యంగా నిర్వహించబడింది.
ఈ సందర్భంగా డా. యెల్లాప్రగడ సుబ్బారావు అవార్డును డా. లోకేశ్వరరావు సజ్జా, సీనియర్ కన్సల్టెంట్ కార్డియోథొరాసిక్ సర్జన్ మరియు డైరెక్టర్ – కార్డియోవాస్క్యులర్ సర్జికల్ రీసెర్చ్, స్టార్ హాస్పిటల్స్, హైదరాబాద్ వారికి ప్రదానం చేశారు. అనంతరం ఆయన “మెడికల్ రీసెర్చ్ – గతం, వర్తమానం, భవిష్యత్” అంశంపై ముఖ్య ఉపన్యాసం ఇచ్చారు .
ఈ కార్యక్రమానికి శ్రీ సౌరభ్ గౌర్, IAS, ఆరోగ్య–వైద్య–కుటుంబ సంక్షేమ శాఖ కార్యదర్శి; డా. కె. మధు మూర్తి, ఛైర్మన్ – APSCHE; డా. జి. రఘునందన్, వైద్య విద్యా సంచాలకులు; మరియు న్యాయమూర్తి యు.డి. దుర్గ ప్రసాద్ రావు (రిటైర్డ్), హై పవర్ కమిటీ ఛైర్మన్ ముఖ్య అతిథులుగా పాల్గొన్నారు.
ఈ కార్యక్రమాన్ని డా. ఎం. లక్ష్మి సూర్య ప్రభ, డైరెక్టర్ (ఆర్ & డి), డా. వి. రాధికా రెడ్డి, రిజిస్ట్రార్, మరియు డా. పి. చంద్రశేఖర్, వైస్-చాన్సలర్ నాయకత్వంలో విజయవంతంగా నిర్వహించారు.
పరిశోధనకు ప్రాధాన్యత ఇస్తూ, యువ శాస్త్రవేత్తలను ప్రోత్సహిస్తూ, ప్రపంచ వైద్యానికి దిశానిర్దేశం చేసిన మహానుభావుల వారసత్వాన్ని గౌరవించడమే ఈ పరిశోధనా దినోత్సవం ప్రధాన ఉద్దేశ్యమని విశ్వవిద్యాలయ అధికారులు తెలిపారు.
